الخميس 27 تشرين الثاني 2014 التوقيت المحلي: 13:25

برامج / مواويل وشِعر

الخطاط، ومأمون، وآل المسافر في واحــة الشــعر

في أحد بساتين الناصريةفي أحد بساتين الناصرية
x
في أحد بساتين الناصرية
في أحد بساتين الناصرية
جبار عودة الخطاط، وعارف مامون، ونعيم آل مسافر، ثلاثة شعراء عراقيين مبدعين، ينتمون لجيل القصيدة المثقفة، ولا عجب في ذلك. فقد إنخرط هؤلاء الثلاثة في ميادين الأدب والصحافة مبكراً. فأبدعوا في حقولها قبل خوضهم غمار القصيدة الشعبية.

ومن الجدير بالذكر أن معظم قصائد شعرائنا الثلاثة تحمل في موضوعاتها سمات الموقف الوطني المسؤول.

تعالوا لنتعرف على ثلاث قصائد، وعلى وتجربة شعرائها المبدعة.

عــــوافـــي
للشاعر عارف مامون


عوافي اعله الأكل ومبارك اعله الجاي

بس نريد نفتك من طلايبكم
شدوا احزامكم وتعاركوا اعله التاج

بس عوفوا الوطن خارج معاركم
مسكين الشعب خلاكم اتحكمون

سنه تاكل سنه وماشاف راحتكم
ردنه الكهربا  ماردنه نبني قصور

هم هذا الطلب رايد توافقكم؟
ولكم للاسف وصلت لحد الغيض


الشعب شابع مآسي وجنّه ميهمكم
لا نفطه وأمن لا راحه لا بنيان

بشرف كلمن شريف الوضع عاجبكم؟
ماخذتم درس من طيحة الطاغوت

وامس جنتم مثلنه الضيم كاتلكم
كون بكَد هممكم على المناصب كون

على هاي الرعيه نشوف همتكم
ترقيتوا نعم ونزاح ذاك العوز


وبلايه حسد شدات راتبكم
بسلامة خالكم اكلوا وهنيء الزاد

بس نصفوا الادين الامس شالتكم


***   ***   ***

رد حــــــمد
للشاعر جبار عودة الخطاط


*الى المبدع الكبير الرمز مظفر النواب


ياريل وصل حمد
جبار عوده الخطاط
جبار عوده الخطاط
مني سلام وشوك
كله الشِعر ياحمد
الصايته ايلوك
ياملح شِعر العرب
يلشَعر راسك شلب
سافر إبجسمك سفر
وروحك تظل ياوفي
مشتوله وي الكصب


*****

ياطير من ينذبح يجفل
يغرّد تعب
يسـَكت إغراب النعب
رفة إجناحك سحر
رفة إجناحك شعر
عندك قصايد نوك
عندك فخاتي شجن
عَ النجمه غنن فوك
عَ النسمة ناحن شوك


*****

آنه ارد اروح الحمد
ماروح انه الغيره
وأحجيله 00
صارت صدك
وباعوني إبليرة
والليره طلعت شبه
وإشتعلت الحيره
والناس تنطر حمد
يرجع بريل السعد
محمّل أشعار ورد
ويكحّل الديره
آنه ارد أروح الحمد
ماروح أنه الغيره


*****

ياريل وصّي حمد
خل يطوي ليل السفر
ويجمع تصاويره
ياريل شنهي العذر
ماتعباه السفر ..
وهوَّ بجحيل العمر
والدنيه فريره


*****

ياريل بلكت تمر
توصّل سلام الِشعر
وبوساتنه إبكجه
ياريل اوصل حمد
ياساحر الحِسجه
ياريل لا تشتمر
إضلوعي الك سجه


*****

(ياريل صيح بقهر
صيحة عشك ياريل
هودر هواهم ولك
حدر السنابل كطه)
ياريل خاف إتعَثر
بخيال ذيب السِطه
اليحوف نص الليل
ياريل حّمل نده
من هور اِلغموكه
وإخذ الجفن لو رحت
سويه غلك فوكه
وضم النده والدمع
الحوشيه لتبوكه


*****

الشعر عندك وطن
والوطن عندك شعر
الوطن عندك جرح
الشعر كمر الصبح
والشعر كيمر ملح
عالناس خضر ضوه
فتّحت باب الِشعر
خليته يشتم هوه
حسيت بيه مخنوك
خاويته من الزغر
وكل ساعه بيه محروك
الشعر عندك شعر
يجري بسواجي الفجر
وعد غيرك اصبح سوك


****

ياحمد هلبت تمر
ويشتعل بينه الحيل
وإنرد ندك اكهوه
ويرجع يشمنه الهيل
مر بينه مره حمد
وصافح صبحنه اريوك
ياريل بلغ حمد مني سلام وشوك
مني سلام 


***  ***  ***

مقاطع من قصائد
الشاعر نعيم آل مسافر



حــــطب

جبنه عمرنه حطب
Iraq -- Iraqi poet Naeem Aal Musafer, Nov2010
Iraq -- Iraqi poet Naeem Aal Musafer, Nov2010
وحماله لهل الحطب
وجبنه عمرنه نخل
مايوم أكلنه...رطب
الله يا هل وطن
الله...يا هل شعب
لآ فادك الطاغيه
ولآ فادك المنتخب
مثل الجمل بالسفر
لمّن يحمل..ذهب
ومن توصل القافله
حصتنه بس التعب


***  ***

من حيث ياهو اليجي
راكب فرس..من خشب
وإستاد...بل..إننا!
وإستاد بس بالخطب
ويصير...تالي أسد
عالكرسي واوي العنب
خصم الحچي ياوطن
ومعلينه شنهو السبب
كل المشوا...والأجو
من الكرد للعرب
ماشوف بيهم..بعد
چعب التطگه بچعب


****  ****


شمعه وهوى

لتحير بيه بعد
من تظهر او تختفي
شمعه آنه وإنته الهوى
بالحالتين انطفي
من تظهر اتنفسك
وأشتعل ما أشتفي
لو غبت عني اختنگ
منك فلا أكتفي
شمعه آنه وإنته الهوى
بالحالتين انطفي


****   ****

الوالي

عدنه ماتم مدري عيد
والفقيد ويانه حاضر
يختلف عن كل فقيد
مدري نلطم من نذكره
مدري نقراله نشيد
ومدري وين العله تكمن؟
بينه؟ بالوالي الجديد؟
عدنه وادم من ربعنه!
تحلم برجعة يزيد!


****   ****


المـــرايــه

لو ردت أعرف أخبارك
لو ردت أسأل عليك
تدري أسألني عليه؟
ولو ردت بالعين اشوفك
اوگف گبال المرايه
وأشبع من الشوف بيه
لكن آنه من ابوسك
بارده اخدود المرايه
وما أشبگك بين إديه


****   ****


المرثيه
بحق الوالد

رب البيت چان وحافظ البيت
ربنه الثاني يعني بهاي دنيانه
لأن ناره سلام وبرد بالكيظ
ولأن فردوس نلگه ابين ذرعانه
ومن گد رحمته وگد رأفة البيه
گبل لا نعتذر يغفر خطايانه


****   ****


سبـــابـــه

سبابه إسمها التظغط إزناذ
والتلزم قلم تتسمه سبابه
بس فرق الأرض عن السماوات
ما بين الرمي ومابين الكتابه
مو كل سيف يلمع ياخذ الحيف
ولا كل سيف ينسل يگضي الطلابه
والسيف الصدگ شفناها بالعين
ماخذ حيف ربعه وهوه بگرابه


****   ****


جــــرح

نعم شفتوا جرح عورله سچين
إنذبخ سيف الطغاة بمنحر حسين
انبنت گبه لسبيه إبلدة الشام
وصارت مزبله گبور السلاطين
انگلب دم الحسين الحرگه ودموع
وتفاعل ونفجر ثورات بعدين



الخطاط، ومأمون، وآل المسافر في واحــة الشــعر
الخطاط، ومأمون، وآل المسافر في واحــة الشــعر i
|| 0:00:00
...    
🔇
X