روابط للدخول

خبر عاجل

قصائد لنائل المظفر ولشعراء مبدعين آخرين


الشاعر نائل المظفر
الشاعر نائل المظفر
في أجواء يغمرها عطر القصيدة الشعبية، ويبلل صيفها اللاهب ندى الحب المتساقط من سماوات الإبداع العراقي، نمضي معاً إلى بساتين المبدعين العراقيين، فنقطف أولاً ثمار قصيدة الشاعر نائل المظفر، والتي أسماها مو كلمن فتحلك بابه يهواك"، لننتقل معكم بعدها إلى قصائد حب أخرى، وإلى أبوذيات عراقية قديمة وجديدة، ولعدد من المواويل العراقية العذبة، التي صدحت عبر حلقة هذا الأسبوع من "مواويل وشعر".

وإليكم رائعة نائل المظفر:

موكلمن فتحلك بابه يهواك
ولا كلمن يكرهك بابه ينسد
اكو مسدود بابه وكلبه مفتوح
واكو مفتوح بابه أو كلبه اسود
اذا طشيت صحبانك على الماي
اثكلهم وفه جواك يركد
واخففهم يضل طافح على راي
يروح ويه الجزر ورجعه المد
اذا تحتار سافر تعرف الناس
منو ايهد القطار او يوكف ازيد
اكو اشده ابحبل ويكطعه ويروح
وكو بكل الشرف علسجه ينشد
وكو امشيه قطارك عينه تحتار
اوبالحظه الاخيره اوياك يصعد
واكو ايشيل المحطه ويه القطارات
ويدكه على كلبه اوصدره ينسد
فرق بين اليعبدك ب المحطات
او فرق بين البناك ابكلبه معبد
لاتامن بشر من طينه مخلوق
بس اربع طعش طينه محمد
موكلمن ضحكلك منه ترتاح
تره ناب الضبع كل ضحكه تنحد
ولا تحقد على كلمن يبجيك
اذا دمعك طفح صدكني تبرد
البشر دله اويفور ابداخله الضيم
وذايطفح دمع نيرانه تخمد
ولا تحقد على الصعدو بالجناح
معروف الصكر لوجنحه ينشد
او موكلمن نزل يسمى مذلول
ولا كلمن صعد يسمى امجد
اكو صاعد رغم ماهو عالكاع
وكو نازل يضل لوقمه يصعد
راسك منتصب اعلى من الدين
بس من السهل تتناوشه اليد
وذا عندك جبل خلهم يصعدون
فرق بين الصعد وراد يصعد
اكو ايهده الجبل لو هد الجفوف
وكو ايهد الجبل لو جفه ينهد
اوعلل مبرد كفر تنغر السيوف
لان سيف اعلى سيف بكلبه ينحد
وذا عنهم رحل كلهم يخصرون
شنو ذبح السيوف ابليه مبرد
مايرحل جذب موخاف يعمون
ويضل السيف تالي ابكصبه ينصد
وذا تعزف لحن ويهمك انسان
لاتكطع كمانك صعبه ينشد
مرات اللحن ما يطرب انسان
او مرات البشر اذاناته تنسد
او مرات اللحن يطربه طرشان
بس طبع اليسمعه زور يشهد
على البلبل يكلك منكر الصوت
وذا ينهك حماره ايصيح غرد
وذا حجيك حكم وتخاطب الناس
كل راس على كده وياك ينشد
لان روس البشر عكس الفراغات
وكل ماتنترس تستوعب ازيد
وذا تحجي اويرد صوتك كما كان
يعني اليستمع فارغ مجرد
صوتك مايرد للراسه متروس
لان بس بالفراغ الصوت يرتد
وذا ضيمك كبر لاتحجي بالعين
اوتشف الدينه كله ابلون اسود
منو بهذا الوكت ماغيره الضيم
حتى ابيوم الاحد ماكو احد
لاكن لا تضل تحسب توابيت
انى كبلك علي صب اسود العد
ارفعت راسي اوكمت احسب بالعراس
وعلى خشمي سواد البيض انكد
ولو اذاني الطفل من شفته بالعيد
يشد بجروح ثوبه اودمعه عل الخد
بس اني افرحت جه جته الطفل
مسح كل الدموع اوراح عيد
علمنه الطفل نصبر على الضيم
او طلع منه الطفل ايمانه ازيد

للمزيد يرجى الاستماع إلى الملف الصوتي.
XS
SM
MD
LG