روابط للدخول

إيمان الكوفي: غافل وقاري وﮔادني بحنيه


الشاعرة ايمان الكوفي

الشاعرة ايمان الكوفي

غافل وقاري وﮔادني بحنيه
ابيمنا شبـﭼني بيسرته الـﭼفيه
ﮔلي ارد اعلمـﭻ لعبة الـﭼوبيه
يمكن نسيت الخاتم بـﭼف ايده
وترﭼيتي يمه احترﮔت بتنهيده
حين الهمسلي بوصله ومواعيده
الدنيا اخذني ميسره ومسبيه

***
وچ آه يمه مادريتي بناري
روحي سحنه برقته الانباري
لو طاف جفني بحجة الخطاري
چا زال همي وطاب جرح البيه

***
هذ اللي هزني وحققالي طيوفي
شتت عذابي وراح شكي وخوفي
مـﮔيوله يمه ابن العشاير يوفي
وين انته ساكن ﮔال بالغربيه

***
موهوم لو يمكن كلامك خانك
ساكن دليلي ومهجتي عنوانك
بظلوعي حاضر مهرك ونيشانك
ياابن الغوالي بهمتك معنيه

***
طفلة هويتك فارس الاحلامي
عد الشدايد للزمط مـﮔدامي
اعطف عليه لاتوقع اعدامي
(وﮔوم درجلي وامش ﮔدامي
ولاتخاف من اهلي ولا عمامي)
بت عمك انه وبالاصل عربيه

***
واسيني يمه مادريتي بحالي
شت مني عقلي واحترگ دلالي
حاير طبيبي شنهو علتي إشمالي
ردتلي روحي بس حجه بطاريه

***
يمه سحرني واصبحت مجنونه
اسمر دخيل الله شحلات عيونه
متوسم الغيرة وبطل يدعونه
ذل الغريب ورﮔبته محنيه

***
مولود سوي عزمي كل جاراتـﭻ
انطاچ ربـﭻ وفي بنذوراتـﭻ
فخر العرب صال وطرد شماتـﭻ
بصحوة محبه وغيرة النشميه

***
طب الغريب وسال دمه ودمي
حط الحواجز يم مضيفه ويمي
مانعني اغازل خلي وابنيي عمي
يندهله سني وصاحلي شيعيه

***
لا والرسالة وعزة ابن النهرين
ينحب مثل نوحي اونيني لحسين
عن جود حيدر صاغ عمره إدواوين
من عدِّي بيه مو غريب عليه

XS
SM
MD
LG