روابط للدخول

عبد الحسين الحلفي: يا برد الحدايقِ يا صباح الخير


الشاعر عبد الحسين الحلفي

الشاعر عبد الحسين الحلفي

يابرد الحدايق يا صبـــاح الخـــــير
يا بوسة نده بخدود كل مشتل

يا كلمه هله مو روح غير الـــروح
يا عين الكحل مو عين تتكحل

يا لمة احبــــــابي برجعة الغيـــــاب
والشافك سكر والشابكك قندل

مر وجهك صبح والزلف نص الليل
شلون الصبح مر والليل ما كمل

ونظراتك عرش ورموشك الحراس
ومــــا رايــد حيـاته البيك يتغزل

ولك يا مدري شنهي وخدك ولايـات
وشفـــــافك محطه ريلهه معسل

والمشيه احتفال وتركصلها الكـــاع
وبـهـزه أيـديـك اكلــــوب تـتـدنـدل

والركبه سوالف طشت اعله الناس
المخبـل عقـل والعـــــــــاقل اتخبل

يمن فدوه الاجانب كلها للرجلـــــين
يلموساك ســــــاكك ساك لو ململ

طركاعة الفتني اشكد اللك حــبـيـت
وطركـــــــاعه اللفـتـك لأن تـتــحمل

حبك امتحـــــــــــــان ايدوخ الميدوخ
لان حتى الجواب اعليــــك هم يسأل

ياغاية صفنتي وحقي اصفن بيك
اشو بالصفنه كلبك هـــم علي بدل

لا تزعل علي خاف ارد ازعلك يوم
مو قصدي ازعـــــــــلك حتى تدلل

ولا تعله علي مو خاف تنزل يوم
والعايش ابعـــــــــــالي لو نزل ينذل

علمودك احبك انه شني عندي
لا حب لا كره.الحـــب والكره وشل

يا سبحة عشك وخيوطها الشريان
والشاهود كلبي ومنك انه اخجل

احصدني ابدلالك علعل المحصول
بس انه اخاف عليك تتعـــلعــــل

شني معناك بعدي انت ما موجود
اذا ماكو حصاد منين اكو منجل

بنص فركت اسنونك خلي روحي اتعيش
واخذها بهلمسافه وياك من ترحل

XS
SM
MD
LG