روابط للدخول

عبد الحسين الحلفي: شحلات اللي تحبه گبل ميروح... بحلات آخر نفس من تـﮕضي الانفاس


الشاعر عبد الحسين الحلفي

الشاعر عبد الحسين الحلفي

شحلات اللي تحبه گبل ميروح
بحلات اخر نفس من تـﮕضي الانفاس
وحلات العيد اول يوم بالعيد
وحلاتك من تجيني اول الناس
افك ريجي بصباح الخير يفلان
وصباح النور منك تاج عالراس
تعال وجيب خدك واكتل الليل
گبل خدك .. ضوه خدودك الينباس
تعال شعطلك ما جيتني شبيك
اريدن بيك افوز وارفع الكاس
تساويني بنظر عينك مع الغير
اذا عينك عمت باوع بالاحساس
ولك شوف الورد مايملك عيون
وبلحظة الشم يميز الناس
شگد تخطر ابالي والك اشتاگ
ولالحظه اعله بالك بيها اخطر
تعال واغلط وياي وانته معذور
ومو انه الاعذرك انته تعذر
حتى صيامي يفرق عن الاسلام
حسب جيتك يجوز يطول اشهر
تعال ومر علي حتى لو رمضان
اشوفك عيد گبل العيد وافطر
تعال شبيك ادخلك جنة اشعار
وافرك احلى فره بين الاسطر
ولك حتى السما من تحِّن عالگاع
تظل تبچي ومطر عالگاع تمطر
تعال شعطلك ما جيتني شبيك
انه وبيتنه وشارعنه ننطر
كل ساعه اطلع اسمع صوت عالباب
اثاري الباب ظل بروحه يسطر

XS
SM
MD
LG