روابط للدخول

ياريل وصل حمد
مني سلام وشوك
ﮔله الشِعر ياحمد
الصايته ايلوگ
ياملح شِعر العرب
يلشَعر راسك شلب
سافر إبجسمك سفر
وروحك تظل ياوفي
مشتوله وي الـﮕصب
*****
ياطير من ينذبح يجفل
يغرّد تعب
يسـَكت إغراب النعب
رفة إجناحك سحر
رفة إجناحك شعر
عندك قصايد نوگ
عندك فخاتي شجن
عَ النجمه غنن فوگ
عَ النسمة ناحن شوگ
*****
آنه ارد اروح الحمد
ماروح انه الغيره
وأحـﭽيله
صارت صدگ
وباعوني إبليرة
والليره طلعت شبه
وإشتعلت الحيره
والناس تنطر حمد
يرجع بريل السعد
محمّل أشعار ورد
ويكحّل الديره
آنه ارد أروح الحمد
ماروح أنه الغيره
*****
ياريل وصّي حمد
خل يطوي ليل السفر
ويجمع تصاويره
ياريل شنهي العذر
ماتعباه السفر..
وهوَّ بجحيل العمر
والدنيه فريره
*****
ياريل بلكت تمر
توصّل سلام الِشعر
وبوساتنه إبكجه
ياريل اوصل حمد
ياساحر الحِسجه
ياريل لا تشتمر
إضلوعي الك سـﭽـه
*****
(ياريل صيح بقهر
صيحة عشگ ياريل
هودر هواهم ولك
حدر السنابل ﮔطه)
ياريل خاف إتعَثر
بخيال ذيب السِطه
اليحوف نص الليل
ياريل حّمل نده
من هور اِلغموﮔـه
وإخذ الـﭽفن لو رحت
سويه غلگ فوﮔـه
وضم النده والدمع
الحوشيه لتبوﮔـه
*****
الشعر عندك وطن
والوطن عندك شعر
الوطن عندك جرح
الشعر ﮔمر الصبح
والشعر ﮔيمر ملح
عالناس خضر ضوه
فتّحت باب الِشعر
خليته يشتم هوه
حسيت بيه مخنوگ
خاويته من الزغر
وكل ساعه بيه محروگ
الشعر عندك شعر
يجري بسواجي الفجر
وعد غيرك اصبح سوگ
****
ياحمد هلبت تمر
ويشتعل بينه الحيل
وإنرد ندگ اﮔـهوه
ويرجع يشمنه الهيل
مر بينه مره حمد
وصافح صبحنه اريوگ
ياريل بلغ حمد مني سلام وشوگ
مني سلام

XS
SM
MD
LG