روابط للدخول

إذا كان نخل السماوة الذي( طرَّته سمرة) في يوما ما، واتكى على لسان المطرب حسين نعمة صارخاً: سعف وكرب ظليت مابيَّه ثمرَّة. فإنه اليوم يقول غير ذلك، بعد أن ملأه الشعراء بثمر الشعرالناضج، حتى أصبح مكتنزاً بأحلى ما يحمله النخل السماوي العراقي الأصيل.

وهاهم شعراء السماوة اليوم يزرعون، ويفلحون، ويسقون، فيحصلون على ثمار زرعهم شعراً متميزاً.

أمامنا في "مواويل وشعر" اليوم ثلاث قصائد، هي أحلى من العسل، لثلاثة من شعراء السماوة الكبار: من كاظم آل جابر السماوي، الى محسن الخياط، والى كريم الجسار. فتعالوا نستمتع معا بحلاوة الثمر والشعر السماوي الباهر.

شط الملح
للشاعر كاظم آل جابر السماوي


ياشط الملح دومك تظل عطشان
تترجه النده وتتوسل يعينك
وصفناتك تجرهه وثگل حملك ريل
وتفز السچچ كلما گرب بينك
غسلت اجدامك بدمعي وگلتك فوت
ونفضت هدومك بوجهي ووسخ شينك
وتلگيتك محطه وهودرت بالروح
وخدرت واستراحت كل فراكينك
تلهم بالصبر ويطش ظلام البيك
بلچي من الفجر تلحگ نياشينك
ظنيت الليالي توج نهار البيك
ثاري البيك لبه اصخامهه ابعينك
ثاري البيك منحر والضمير اسيوف
وانت اوحيد والتهبت صواوينك
خذتني بسچتك تسحگ گلب ملهوف
وكل لهفه اچرخ والحگ سچاچينك
عالمامش تلوچ وكل جرح عطشان
متعني السراب اتبخ چوانينك
جثه اتواكحت والسچه عزراييل
.وكل چف ناذر ايجر من مصارينك
يمرافك ابليس وماحسبت احساب
من اول ما كفرخلبص غزل دينك
گبلك چم ملح ذاب اويگطرة ماي
ياقصر الرمل طحت بروازينك
طبع الگاع تنطي شما ملحهه ايزود
لوتحچي البزايز چا كفر طينك


*** *** ***

تعال الحگ
للشاعر محسن الخياط


تعال الحگ تعال اليوم ما طولك نباع ازرگ
وخذلك شمعه توصل بيك خاف يفوتك المفرگ
الوكت عبره وخصرهه رفيع وبنادم عليه يزلگ
صبغ راسه الوكت فرحان چنه بجيتك يطلگ
يطور التعب المطبگ
يطليع الشويثي شبيك ما تنشگ
تعال الحگ تعال اليوم ماطولك نباع ازرك
تعال الحگ عله عمري البگه مدري اشكثر منه وبگه معلگ
وانه صبري جرد جرجيت شگيته وتشگه ردود فدوه يروح خل ينشگ
انه گلبي شكر محروگ طاح بگصب وبچالي ولمَّه بكاغد مشگگ
اجيتك ساجيه بلا ماي بتراب الدفني اغرگ
وانه اضحك عالدفني وراح ... ارد اردود ما صدگ
اخاف يفوت عمري عليك ويعفسه الهوه ويعتگ
تره الديوان لو هجروه بس البوم بي ينغگ
تره من يكبر التنور طبعه يسيج يتفشگ
تره من يبرد التنور تلتم خبزته وتلزگ
وبعد من يلتوي البسمار ما بي حيل من يندگ
تره عمري ترد اردود تحوي شراع المزَّگ
تعال الحگ تعال اليوم ماطولك نباع ازرگ


*** *** ***


بعد شالحگ؟
للشاعر كريم الجسار


بعد شالحگ جزه النيسان
والما لحگ ما يلحگ
ولا بيدي رسن دنياي
والوي عنانهه وتسحگ
يقنديل الليالي السود
نمنه وبعدك امعلگ
يدرويش القوافي الجام
من جان الوكت زيبگ
الك بي هوه العزاب
لا غرب ولا شرگ
المه وروحي ثوب عروس
ما كَتلي هوه العزاب للمفرگ
شمعه شتاخذ من الليل
خلصت وابو طبيله
اتعطل وما دگ
وانا يا خوي مو ايوب
والتحت الثكال شما صبر يزهگ
اخذلك چلمه صوغه .. الشمعه تگظي بساع
مو بس الهدوم الناس هم تعتگ
وخلينه انعم الله رطوبة السباح
لا ريعان ظل ولا نباع ازرگ
بعد شالحگ؟
زمانك مو زمان الچان
ماهو الواعد وصدگ
اظملك حفنه مني وضوگ
واصفن بي من تشهگ
تلگاني هذاك انه
فرق بس الجروح اغمگ
ادور بطارف الدولاب
مدري شظامه التطلگ
بعد شالحگ
وكت ما عاف ذاك الحيل
هسه ايعوفني امعوگ
لو يعرك وجه دنياي
للعنده وجه يعرگ
تسطر واليطيح ايطيح
وشراع الورق ينشگ
دنيه الصاح منهه الحيد
مو ندمه الرجيچ يصيح من ينطگ
بعد شالحگ
يليل البارحه اندليتني بيا صوب
لو ما ظال لون البابنه المغلگ
لاكَيني عصاري بسوكَنه المسكَوف
وبريحة عبي الحلوات خل نغرگ
وي زف الفخاتي على الشواطي غروب
ومواعد عشگ وعيون تتعانگ
وخل برد القوافي اينزز النيشان
واعذر غيضته ويكفيك ما دنگ



نخـل السمـاوة يگــول أحــلى القصـايـد
XS
SM
MD
LG