روابط للدخول

بين فرح العيد، وروعة الشعر، ولغة الموسيقى روابط وقواسم مشتركة، وبين العيد وأمنيات الناس أبجدية واحدة، إذ لا يمكن للعيد أن يمر دون الشعر، والغناء، وألفراح، وألالوان، والحب، والتسامح، وألامنيات الخضراء.

ولعل العيد الذي يحتفل به العراقيون مع أحبتهم هذه الأيام، هو غير العيد الذي يمر على المغتربين العراقيين. فوجع الغربة، وشوق القلوب للوطن، والأهل يطغي حتماً على كل سعادات العيد. واليوم إذ نحتفي مع العراقيين بأعيادهم في الداخل او الخارج، فإننا لا نأتي لهم بغير الشعر، قصائد وأبوذيات ودارميات خاصة بالعيد، ولا نبعث لهم من خلال (مواويل وشعر) إلاَّ الموسيقى، والشجن العراقي الدافىء.

اليكم اليوم قصائد لرياض الركابي، ورافع المگوطر، وغيرهما من الشعراء المبدعين .
الشاعر رياض الركابي

الشاعر رياض الركابي


أمنــــية العيـــــــد
للشاعر رياض الركابي


تمنيت چفك تدگ...بابي ابنهار العيد
واركضلك ابلهفتي، ونتحاضن ايد ابأيد
محتاج وك شوفتك... هو اليحب شيريد
وارجف واصيحن صدگ، انت صدگ... مو وهم
جيتك اوعيد الضحى، عيدين هلّن سوه.. او كلشي بعيوني ابتسم
او اوگف استعداد الك ... طالب ابأول سنه، واگف ابرفعة علم
او مقتنع ... انت وطن ... وآنه بدونك عدم
وأقره نشيدي الك ... ياموطني ..او منيتي .. انت المهم والاهم
وانت الهوى والضوه ... او غلطان من ابعدت عنك واكلني الندم
يامنيتي او موطني ... ما أحنه طولك وكت ... باقي انت ذاك الاشم
الباب يوسع شمس .. خل نفرح ابجيتك ، دوسة بخت هالجدم
العتبة صاحت هله، والباب من شوگه الك، جرله الف حسره
او بالبيت شوف اشألك، محتفظ من ذكرى
اهنا رسايل امس، اقراها بلكت تحن..... لو بطلت تقره
وگلّب البوم الصور، شوف اشچنت... وشصرت
بالحال انت ادرى
وهنانه باقة ورد، بأنفاسك او ريحتك ... ليهسه متعطره
وك چم عيد مر او جزه .... ايشح هوى اسوالفك ... واختنگ بالعبره
والقسوه مو شيمتك .... امن امك رضعت الوفه، او كل طيبة البصرة
وك چم عيد مر او جزه ... تجبر خواطر غُرب .... بس خاطري اتكِسره
تجبر خواطر غُرب .... بس خاطري اتكِسره


**** **** ****

دارميــــــات للعيـــــــــــــــد


گالولي اجاك العيد
چا ليمته اتهيد
عيد اليمر بجفاك
ماينحسب عيد


****

تدري آنه گبل العيد
عاشورك اوياي
حاسمها لو مو عيد
ماتضحك اشفاي


****

كون الفرح ينباع
واشريلك العيد
يالشوفتك عيدين
عيد احله من عيد


****

هاك العمر واختار
من عنده شتريد
بس كون اگضي اوياك
صبحية العيد


****

العيد اجانه العيد
اشلون اهنيك
أهديلك آنه العين
لوبيها اخليك؟


****

إنتي الذهب والماس
والجوهر انتي
والدنيه تصبح عيد
كل ماضحكتي


****

بالسنه ثنين اعياد
أسمع يگولون
وكل ضحكة منك عيد
ياحلو العيون


****

گالولي باچر عيد
إلمن تعايد
مادروا إنته العيد
وبگلبي گاعد


****

فرحة وسعادة انطيك
بس گلي شتريد
ومني اخذ بوسات
من هسه للعيد


****

عيدية الك بوسات
ما منها موجود
تطبع على الدلال
لامو عالخدود


****

خلني بعذاب الشوگـ
مارايد العيد
چي لنك انته اليوم
عن عيني ابعيد


****


كَالولي جاك العيد
چا شلِّي بالعيد
عاشور اريده يصير
ما طولك بعيد


****


كَالولي اجاك العيد
كلت أشإجه اوياه
كَالولي مثل الراح
كَلت الله وياه



ابــوذيـــات للعـــــــــــــيد


نبيل وطبعك توافي وعيدك
وأحسبك من اعز ناسي وعيدك
عيد الفرح عالوادم وعيدك
سرور وفرح ويامك زهيه


****

يهل ناديت بسمي هواي..عيده
ويل ماخذ دليلي وياك..عيده
الگلب مو بس بعد رمضان..عيده
عندي العيد من نگعد سويه


****

حبيبي آنه احبك فدوه... بسمر
لأن حبك بنص الگلب... بسمر
صحيح انت حلو ياترف... بسمر
تمرمر كلي منتمر عليه


****

شجاك ومنشدت عني ... وانا سال
وكلها تشافت جروحك... وانا سال
اشوفن دمعتك نشفت... وانا سال
دمعي على الخدين واحركهناليه


****

حسافه العمر دونك... ياهوانه
ياعشكنه ياحجينه... ياهوانه
دخيل الله انت كلي... ياهو آنه
وهويتك ليش وشجابكعليه


****

ترف عشرين عمرك... ماتعده
واذا كَلبي هجرته... ماتعده
تعدلي هواي لاجن... ماتعده
ذنبك من طحت تضحك عليه


****

لتظن نار كَلبي عليك... تبرد
وبعد كل الحچيته وياك... تبي رد
شوكت ماجيك بالسچين... تبرد
دهاك اذبحني هو شظال بيه؟؟


في الملف الصوتي أدناه العديد من القصائد والأبوذيات والدارميات الأخرى
قصائد للفرح والعيد والناس
XS
SM
MD
LG