روابط للدخول

مرة قال مظفر النواب:
عمُر وإتعدَّه التلاثين لا يفلان
ومرة قال الشاعر الراحل عيدان الجصاني:
شلون بعشكَ الأربعين إشلون يخواني؟؟

وفي حلقة هذا الاسبوع من "مواويل وشعر" يطَّل علينا الشاعر المبدع حامد كَعيد الجبوري من نافذة "الخمسين" بقصيدة جميلة أسماها "هوى الخمسين" ومابين النواب، والجصاني، والجبوري، وقصائدهم الجميلة، يظل الحب لعبة السنين، والأعمار جميعها.

فالحب هو الحب، سواء كان في العشرين، او في الثمانين. ولنا في رائعة الشاعر كاظم اسماعيل الكَاطع التي قال فيها:
هوى تالي العمر كتال
وأكثر من أيام الصبا إيعَّذب

بقصيدة "هوى الخمسين" للشاعر حامد كَعيد الجبوري نفتتح حلقة هذا الأسبوع من "مواويل وشعر"، والى جانبها أبوذيات جديدة واخرى قديمة، ومواويل عراقية، ونصوص غنائية.

ولكن سنبقى أولاً مع "هوى الخمسين" رائعة الشاعر حامد كعيد الجبوري:

ترهدن جوز حالي مُرخص أشمتريد
رهينَه الروح سباحَه أبجرف هالي
ظُميت أسنين وأتنطر صبر صبخه
أفوج أبماي وسبح بالعطش تالي
يهنيالك دخيلك سمي بالرحمن
ياسدر الشواطي أفيايهن عالي
يريحان السواجي عنبر ودهله
يامنكل محبه أمجودره أبالي
تنطرتك كمر وتهل عليه أبعيد
ومثل شمس الزغار أخدودها أتلالي
ياغيمة ربيع وثكلت بالماي
شربت مايهه وتجزي وتربالي
ممحله الروح ينهش بالكلب عاكول
صيهود الليالي ويرحَل أهلالي
دريض والعمر يزحف على الخمسين
وتحذر من هوه الخمسين جتالي
*****
محطاتي كضن ودبيب ليك أمشاي
ولامره أكصدتني ولا تراوالي
جلدات الزواجل طشرتهه أصكور
لازقَت مَلابي1 وتاه منوالي
يبو أعيون الوسيعه النهد شايل غيض
دصد عينك عليه ولا تظل سالي
تمنيتك تجيني أغلك عليك العين
وشمك شمة الغايب تعناني
أجيلك مستحي والشيب أكل بالراس
أخافن عين كل واشي أيتخطالي
نسيت العيب والفشلَه وحجي البطران
تنطرتك تجيني أتجيد عذالي
خليها أبكفاك أمعكرات البال
ياهو اللي وشالك يكعُد أكبالي
أطيح أبخاطرك وبجي أبشليلك دم
بطران الحجالك والكلب خالي
تعال أكرب حبيبي أنصفي راي أبراي
مبخوت أعتذرلك بس تعنالي
*****
بخَرت الدرب وجيت ألك حرمَل
شَدات الورد ومهيّل أليالي
أزمـَطت بيك وفضحني أمغانجك ويّاي
لاطيفك لفاني ولاتنخالي
مكدرات الليالي ماتوحها أشموع
لاشمس الله طلعت لالفه الغالي
ترافه ما شفت منك محنه أوياي
لاطيفك لفاني ولاتنخالي
مهظوم البخت حكي العتب وياك
نجلاتك أهوايه وكل عتب مالي
لايغفه الكلب لاينسه المناطر
لاضكت العنب لا ردت أ سلالي
الشكر لله العمر كضيته بس أحلام
والحر الشمس أتكبع خيالي

المزيد في الملف الصوتي.
XS
SM
MD
LG