گمر خالد العامري .. وقصائد أخرى

يقول خالد العامري في ياگمر:

بهيده على بختك يا گمر.. إمساهر واريد اشكيلك
انه غريب ابدنيتي.. مضيّع وادور ابليلك
عن ربعة اهلي، ودلّة الديوان، ومواويلك
عن ضحكة البربين لعيون الدلو
عن رگصة الصفصاف والماي الحلو
عن صحبتي، وخلاني، وعيون النهر
بهيده على بختك يا گمر


يا غربتي..
غربة عصافير التودع اعشوشها... برفّة جنح
ويا دمعتي ...
دمعة الگاع التبچي موت اهروشها... بجية الملح
يا دار اهلنا الطاهره ... مر العمر
عيون اليحب امساهره ...ومامش خبر
بهيده على بختك يا گمر

***
وك يا گمرنه مروَّتك ... حنّي الشواطي بدمعتي
گلهم كبرت اعله الصبر...والونّه صارت غنوتي
مشتاق ابوسن دجله... واشرب مايها
واعزف ترانيم المحبّه بنايها
دجله الهوى ، والسوگ ، والحب ، والسهر
بهيده على بختك يا كمر

للمزيد من القصائد والإبوذيات والمواويل، يرجى الرجوع الى التسجيل الصوتي للبرنامج